Hypertension during pregnancy

కొంత మంది స్త్రీలకి గర్భంతో ఉన్నప్పుడు హైబీపీ ఉంటుంది. ఇది తల్లి, బిడ్డకీ కూడా అంత క్షేమం కాదు. హైబీపీ డెలివరీ అప్పుడూ ఆ తరువాత కూడా సమస్యలు కలుగచేయవచ్చు. అయితే, హైబీపీ రాకుండా చూసుకోవచ్చు, ఒక వేళ వస్తే ట్రీట్మెంట్ ద్వారా తగ్గించుకోవచ్చు. హైబీపి అనేది ఎంత కామనో, ప్రెగ్నెన్సీ టైం‌లో హైబీపీ అనేది కూడా అంత కామన్ అయిపోయింది. అయితే, బ్లడ్ ప్రెజర్‌ని సరిగ్గా కంట్రోల్‌లో పెట్టుకోగలిగితే మీరూ మీ బిడ్డా కూడా క్షేమంగా ఉండే అవకాశాలెక్కువగా ఉంటాయి.

మామూలు సమయం ప్రెగ్నెన్సీ సమయంలో మహిళలు మరింత జాగ్రత్తగా ఉండాలి. ఎందుకంటే తను ఇద్దరి ప్రాణాలను కాపాడుతుంది కాబట్టి. ఈ నేపథ్యంలోనే ప్రతి ఒక్క ఆరోగ్య సమస్య విషయంలోనూ జాగ్రత్త అవసరం. అందుకే ప్రెగ్నెన్సీ టైమ్‌లో గనుక బీపి ఉంటే ఎలాంటి జాగ్రత్తలు తీసుకోవాలి.. ఎలాంటి డైట్ తీసుకోవాలి. డాక్టర్‌ని ఎప్పుడు సంప్రదించాలి. ఇలాంటి విషయాలన్నీ తెలుసుకోండి.
​హైబీపీ వల్ల వచ్చే సమస్యలు..

తల్లికి..

ప్రెగ్నెంట్స్‌కి బీపి ఎక్కువగా ఉంటే చాలా జాగ్రత్తలు తీసుకోవాలని చెబుతున్నారు డా. ప్రణీత్. ఈయన హైదరాబాద్ బంజారాహిల్స్ కేర్ హాస్పిటల్‌లో కార్డియాలజిస్ట్‌గా చేస్తున్నారు. ఏమాత్రం నిర్లక్ష్యం చేసినా తల్లీ, బిడ్డ ప్రాణాలకే ప్రమాదమని ఆయన చెబుతున్నారు. బీపి ఎక్కువగా ఉంటే తల్లి ప్రాణానికి ముప్పు ఉంటుందని, అదే విధంగా నెలలు నిండకుండానే డెలివరీ అవ్వడం, పరిస్థితి చేయిదాటినప్పుడు పుట్టే బిడ్డ కడుపులోనే కనుమూయడం జరుగుతుందని డా. ప్రణీత్ చెబుతున్నారు. అందుకే కచ్చితంగా బీపి కంట్రోల్ చేసుకోవాలని చెబుతున్నారు డాక్టర్. ప్రీఎక్లెంప్సియా, ఎక్లెంప్సియా, స్ట్రోక్, నొప్పులు రావడానికి మందు ఇవ్వవలసి రావడం, మాయ విడిపోవడం వంటి సమస్యలు తల్లి ఫేస్ చేయవలసి ఉంటుంది.

బిడ్డకి..

ప్రసవ సమయం కన్నా ముందే పుట్టేయడం, పుట్టినప్పుడు తక్కువ బరువు కలిగి ఉండడం. తల్లికి హైబీపీ ఉంటే బేబీకి చాలినంత ఆక్సిజెన్ అందదు, కావాల్సినన్ని పోషకాలు అందవు, ఫలితంగా బేబీ ముందే పుట్టేయడం జరుగుతుంది.

 బీపిని కంట్రోల్ చేసే ఫుడ్ ఇదే..

​హైబీపీ ఉంటే ఏం చేయాలో చూద్దాం..

ప్రెగ్నెన్సీకి ముందు..

1. మీరు గర్భం ధరించడానికి ముందే మీకు హైబీపీ ఉంటే మీరు ప్రెగ్నెన్సీ ప్లాన్ చేసుకున్నప్పుడు మీ డాక్టర్‌తో మాట్లాడండి.

2. మీకు ఉన్న ఇతర సమస్యలు, మీరు తీసుకుంటున్న మెడిసిన్స్ అన్నీ వారితో చర్చించండి.

3. పోషకాలతో కూడిన సమతులాహారం తీసుకుంటూ, రెగ్యులర్‌గా ఎక్సర్సైజ్ చేస్తూ ఆరోగ్యకరమైన బరువు మెయింటెయిన్ చేయండి.

ప్రెగ్నెన్సీలో..

1. ముందే ప్రీనేటర్ కేర్ తీసుకోండి.

2. ఏ మెడిసిన్స్ తీసుకుంటే సేఫ్ అన్నది మీ డాక్టర్‌తో చర్చించి డిసైడ్ చేసుకోండి.

3. మీ డాక్టర్‌తో మాట్లాడకుండా ఏ మెడిసిన్‌ని ఆపవద్దు, కొత్తగా తీసుకోవద్దు.

4. ఇంట్లో రెగ్యులర్ గా మీ బీపీ మానిటర్ చేసుకుంటూ ఉండండి.

5. బీపీ ఎక్కువగా ఉన్నట్లు అనిపిస్తే వెంటనే మీ డాక్టర్‌ని కాంటాక్ట్ చేయండి.

6. ప్రీ ఎక్లెంప్సియా లక్షణాలు, అంటే, తలనొప్పి తగ్గకుండా ఉన్నా, కంటి చూపులో తేడా వచ్చినా, పొట్ట పైభాగంలో నొప్పిగా ఉన్నా, వికారంగా ఉన్నా, వాంతులవుతున్నా, ముఖం ఉబ్బినా, చేతులు ఉబ్బినా, హఠాత్తుగా బరువు పెరిగినా, శ్వాస తీసుకోవడంలో ఇబ్బంది పడుతున్నా తక్షణం మీ డాక్టర్ ని కన్సల్ట్ చేయండి.

7. హెల్దీ ఫుడ్స్ తీసుకుంటూ మీరు ఉండవలసిన బరువు మెయింటెయిన్ చేయండి.

ప్రెగ్నెన్సీ తర్వాత..

1. డెలివరీ తరువాత మీరు ఎలా ఫీల్ అవుతున్నారన్న దాని మీద దృష్టి ఉంచండి.

2. ప్రెగ్నెన్సీ టైంలో మీకు హైబీపీ ఉంటే డెలివరీ తరువాత మీకు స్ట్రోక్, ఇంకా ఇరర ప్రాబ్లమ్స్ వచ్చే రిస్క్ ఎక్కువ, కాబట్టి జాగ్రత్తగా మిమ్మల్ని మీరు గమనిచుకుంటూ ఉండండి.

3. ప్రీ ఎక్లెంప్సియా లక్షణాలు కనబడితే వెంటనే మీ డాక్టర్ దగ్గరకి వెళ్ళిపోండి, మీకు ఎమర్జెన్సీ మెడికల్ కేర్ అవసరం కావచ్చు.

​ఎలాంటి హైబీపీ కండిషన్స్..

మీ ప్రెగ్నెన్సీ ముందూ, ప్రెగ్నెన్సీ‌లో, డెలివరీ తరువాత ఈ కండిషన్స్‌ని మీ డాక్టర్ మానిటర్ చేస్తారు.

1. క్రానిక్ హైబీపీ

మీరు ప్రెగ్నెంట్ అవ్వడానికి ముందే లేదా, 20 వారాల గర్భం కన్నా ముందు మీకు హైబీపీ ఉంటే దాన్ని క్రానిక్ హైబీపీ అంటారు.

2. జెస్టేషనల్ హైబీపీ

మీకు కేవలం ప్రెగ్నెన్సీ టైం లోనే హైబీపీ ఉంటే, మీ యూరిన్ లో ప్రొటీన్ లేకపోతే, ఇతర హార్ట్ లేదా కిడ్నీ ప్రాబ్లంస్ లేకపోతే దాన్ని జెస్టేషనల్ హైబీపీ అంటారు. ఇది సుమారుగా 20 వారాల గర్భం తరువాత, డెలివరీకి దగ్గరగా వస్తుంది. ఈ హైబీపీ డెలివరీ తరువాత తగ్గిపోయే అవకాశాలే ఎక్కువ. అయితే, ఇలా ఉన్న వారికి భవిష్యత్తులో క్రానిక్ హైబీపీ వచ్చే రిస్క్ ఎక్కువ.

3. ప్రీ ఎక్లెంప్సియా

ఇంతకు ముందు నార్మల్ బీపీ ఉండి హఠాత్తుగా బీపీ పెరిగి, యూరిన్ ప్రొటీన్ ఉండి, ఇంకా ఇతర సమస్యలు కూడా ఉంటే దాన్ని ప్రీ ఎక్లెంప్సియా అంటారు. ఈ సమస్య వచ్చిన కొంత మంది స్త్రీలకి సీజర్స్ వచ్చే అవకాశం ఉంది, అంటే ఎక్లెంప్సియా డెవలప్ అవుతుందనమాట. అలా జరిగితే అది ఒక మెడికల్ ఎమర్జెన్సీ గా కన్సిడర్ చేస్తారు.

​ప్రీ ఎక్లెంప్సియా ఎవరికి..

కొంత మందికి ఈ లక్షణాలు ఏవీ పెద్ద కనిపించవు. అందుకే, రెగ్యులర్ గా డాక్టర్ ని కన్సల్ట్ చేయడం అవసరం. ప్రీ ఎక్లెంప్సియా వచ్చే రిస్క్ ఎవరికి ఎక్కువంటే:

1. మొదటి సారి గర్భం ధరించిన వారికి

2. ముందు సారి ప్రెగ్నెన్సీలో ఇదే సమస్య వచ్చిన వారికి

3. క్రానిక్ హైబీపీ కానీ, క్రానిక్ కిడ్నీ డిసీజ్ కానీ రెండూ కానీ ఉన్న వారికి

4. బ్లడ్ క్లాట్స్ పడే రిస్క్ ఉన్న హెల్త్ కండిషన్ ఉన్న వారికి

5. కవలలు లేదా ట్రిప్లెట్స్ తో గర్భం ధరించిన వారికి

6. ఇన్ వట్రో ఫెర్టిలైజేషన్ ద్వారా గర్భం ధరించిన వారికి

7. ఫ్యామిలీ హిస్టరీలో ప్రీఎక్లెంప్సియా ఉన్న వారికి

8. టైప్ 1, లేదా టైప్ 2 డయాబెటీస్ ఉన్న వారికి

9. అధిక బరువు ఉన్న వారికి

10. లూపస్ అనే ఆటో ఇమ్యూన్ డిసీజ్ ఉన్న వారికి

11. 40 సంవత్సరాల కంటే ఎక్కువ వయసు ఉన్న వారికి

​రేర్ కేసెస్‌లో..

కొన్ని రేర్ కేసెస్‌లో ఈ ప్రీఎక్లెంప్సియా అనేది డెలివరీ తరువాత కూడా రావచ్చు. దీన్ని పోస్ట్ పార్టం ప్రీ ఎక్లెంప్సియా అంటారు. ఇది డెలివరీ అయిన 48 గంటల నుండీ ఆరు వారాల తరువాత వరకూ ఎప్పుడైనా రవచ్చు. మీకు ప్రీ ఎక్లెంప్సియా లక్షణాలు ఉంటే వెంటనే మీ డాక్టర్ దగ్గరకి వెళ్ళిపోండి, మీకు ఎమర్జెన్సీ మెడికల్ కేర్ అవసరం రావచ్చు.

Reference: https://telugu.samayam.com/lifestyle/health/how-does-hypertension-affect-during-pregnancy-know-here-all/articleshow/91431849.cms?story=3